الآهـــات
بقلم / عرفه محمد
الآهـات ياما ف حياتنا
كل آهـه وليها معنى وبيها تتشكل حاجات
كل آهـه تحكي قصة
يترسم منها قصيدة
تتكتب منها روايات
ندخل الدنيا بصرخ وفيها آهـه
أول الأنفاس ف دنيا م الآهـات
تجري أيام الطفوله والشباب
والآهـات ليها حكايه وذكريات
ولما طيف الحب يتّملك قلوبنا
والسهر يبقى رفيق الأمسيات
والعيون تدمع لنظره
والحديث يبقى السُكات
لما نتنهد بشوق
تخرج الآهـه تسّمع كل عاشق
تبني دنيا م الفرح والأُمنيات
لما تتهدم قصور الحلم
والآمال تصبح فُتات
والجراح ترسم حياتنا
تخرج الآهـه حزينه
تحرق الحلم اللي مكتوب له الشتات
لما يآلمنا الصديق
أو يتوهنا الطريق
يرتفع فجأة ف حياتنا سور منيع
يحرسه صراخ الآهـات
لما تفصلنا النهاية
عن طريق عدى وفات
والغروب يفرد جناحه
ننهي رحلتنا بآهــه
تختصر عمر ف ساعات
كتبها عرفه في 09:00 صباحاً ::
3 تعليقات
في17,تموز,2007 - 05:11 صباحاً, كيرو كتبها ...
حقا كل اهه وليها حكاية
احسنت احسنت احسنت احسنت
تحياتى لك ايها المبدع الكبير
في17,تموز,2007 - 05:13 صباحاً, عرفه كتبها ...
كيرو كلماتك تقدير كبير لي اشكرك كثيرا عليه
تحياتي وشكري العميق
في08,نيسان,2008 - 07:51 صباحاً, مجهول كتبها ...
كم كثير من الأهات بحياتنا
أخي عرفه تعجبني كثيرا خربشات وزجل حضرتك :$
بارك الله في حضرتك وفي قلم حضرتك
ياتري حضرتك غايب عن الحاره بقالك فترات لييه؟؟؟
اختك بنوتة يابانية :$